RHODINUS Color

RHODINUS Color

Graecis Ρὅδινος, apud Anastasium Bibliothecar. in Benedicto III. Vestem rubeam de rhodina: roseus color est, quem in serico tingendo olim ex tuberculis adnatis radici pimpinellae confici consuevisse, tradit Salmasius; hodie fit e quibusdam seminibus ex India Occidentali allatis, quae similia sunt cimicibus quibus demptum caput. Democritus certe in Physicis, inter colores τὸ ῥόδιον recenset, et apud Aeginetam pigmenti genus memorat τὸ ῥοδοειδές. Hinc Diarhodinus, apud Leonem Ostiens. Chron. Casin. l. 2. c. 44. et l. 3. c. 19. h. e. rhodinus color intensior; Leucorhodinus, alibi, roseus dilutior; Rhodomelinus, color partim luteus, partim rosaceus, apud Car. du Fresne in Glossar. Vide quoque Dominic. Macrum, in Hierolex. et supra Cuchenilla.